Ўзбекистон билан Венгрия ўртасида ҳамкорликни кенгайтириш бўйича олиб борилаётган саъй-ҳаракатлар қатор ахборот агентликлари эътиборидан жой олган. Масалан, РИА Новости ушбу муносабатлар ҳақида тўхталар экан, “Ўзбекистон билан Венгрия ядро энергетикаси бўйича комплекс ҳамкорлик дастурини ишга туширмоқда”, сарлавҳали мақоласини эълон қилди.

“Мазкур ҳамкорлик ҳам технологияларни, ҳам ўзбекистонлик ядро мутахассисларини Венгрияда ўқитишни назарда тутади», дея таъкидлаган Венгрия ташқи ишлар вазири Петер Сийярто ўзбекистонлик ҳамкасби Владимир Норов билан бўлиб ўтган музокаралар якуни бўйича берган баёнотида.

«Муҳим аҳамиятга эга бўлган фактлардан бири шуки, Венгрия ва Ўзбекистон ядровий соҳада комплекс ҳамкорлик дастурини ишга туширмоқда. Ушбу дастур учта элементдан иборат бўлади. Биринчидан, Ўзбекистонда қурилаётган атом электр станциясида Венгриянинг совутиш тизимидан фойдаланилади, чунки АЭС учун танланган маълум ҳудудларда сув етишмайди. Бундан ташқари, ушбу комплекс ҳамкорлик учун таълим асослари керак бўлади. Венгрия олий таълим муассасаларида ўқиётган ўзбекистонлик талабалар ҳар йили 170 та стипендия билан таъминланади. Уларнинг бир қисмини, яъни ядро энергетикаси соҳасидаги бўлажак ўзбек муҳандислари ва экспертларини ҳар йили Венгрияда тайёргарликдан ўтказамиз», – деган Сийярто. Унинг чиқиши ижтимоий тармоқлардан намойиш қилиб борилгани айтилмоқда.

Учинчи элемент, унинг таъкидлашича, Ўзбекистон уран ишлаб чиқариш бўйича дунёда еттинчи ўринни эгаллашини инобатга олган ҳолда иситиш элементлари билан боғлиқ тадқиқотлар ва ишланмалар дастурларини ишга туширишни назарда тутади. «Ядро соҳасини ривожлантириш бўйича ушбу комплекс дастур келажакда Венгрия – Ўзбекистон стратегик ҳамкорлигининг муҳим асоси бўлиб хизмат қилади», – дея таъкидлаган Сийярто.

Венгрия Бош вазири Виктор Орбан Ўзбекистон Республикаси Президенти Шавкат Мирзиёев билан бўлиб ўтган учрашувда Ўзбекистонни Марказий Осиё минтақасида фавқулодда муҳим ҳамкор эканини таъкидлаган. У сиёсат, хавфсизлик, иқтисодиёт ва энергетика нуқтаи-назаридан олиб қараганда икки мамлакат ҳамкорлиги стратегик характерга эга эканини алоҳида таъкидлаган, деб ёзмоқда MTI агентлиги Орбаннинг матбуот котиби Берталан Хаваши берган маълумотга таяниб.

«Сешанба кунги музокаралар чоғида 14 та битим имзоланди. Улар орасида Венгрия билан Ўзбекистон ўртасида стратегик ҳамкорлик ҳамда адлия, атроф-муҳитни муҳофаза қилиш, спорт ва қишлоқ хўжалиги соҳаларида ҳамкорлик қилиш режалари ҳам бор», – дея таъкидлаган Хаваши.

У шунингдек, Орбан Ўзбекистон Президентининг ноябрда Самарқанд шаҳрида бўлиб ўтадиган Туркий давлатлар саммитига таклифини ҳам мамнунлик билан қабул қилганини маълум қилган.

Хабарда Президент Шавкат Мирзиёев 3-4 октябрда расмий ташриф билан Венгрияда бўлгани таъкидланади. Ўзбекистон раҳбари сешанба куни Венгриянинг 20 та етакчи компания ва банклари раҳбарлари ҳамда Венгрия Президенти Каталин Новак билан учрашув ўтказган. Ўзбекистон ва Венгрия компаниялари қиймати 1 миллиард доллардан ортиқ шартнома ва битимларни имзолаган, дейилади хабарда.