Ўзбекистоннинг Венгриядаги элчиси Абат Файзуллаев Будапешт шаҳрида Венгриянинг автомобилсозлик саноатида юқори технологик эҳтиёт қисмларини ишлаб чиқарувчи Raba Automotive Holding Plc. компанияси бош ижрочи директори Бела Хецман билан музокаралар ўтказди.

Қайд этилишича, суҳбат давомида Бела Хецман Ўзбекистон Марказий Осиё минтақасида кучли автомобилсозлик ва қишлоқ хўжалиги машинасозлиги саноатига эгалиги, UzAuto Motors компанияси билан ўзаро манфаатли ҳамкорликни йўлга қўйиш Венгрия компанияси учун катта аҳамиятга эгалигини алоҳида таъкидлаган.

4 октябрь куни Raba Automotive Holding, UzAuto ва Тўғридан-тўғри инвестициялар жамғармаси ўртасида меморандум имзоланган. Унда томонлар автомобиллар учун ғилдирак ўқлари ва шасси бутловчи қисмларини етказиб бериш, уларни ишлаб чиқаришни маҳаллийлаштириш бўйича ҳамкорлик қилиши белгиланган.

Ушбу масалани батафсил муҳокама қилиш ва ҳамкорликнинг кейинги босқичларини белгилаб олиш учун Бела Хецманнинг 10—11 ноябрь кунлари Туркий давлатлар ташкилоти саммитида иштирок этувчи Венгрия делегацияси таркибида Самарқанд шаҳрига ташрифини амалга оширишга келишилган.

Шунингдек, учрашув давомида 10 ноябрь куни Самарқанд шаҳрида ўтказиладиган Ўзбекистон—Венгрия бизнес-форумида иштирок этиш ҳамда маҳаллий ҳамкорлар билан тегишли инвестиция лойиҳаларини муҳокама қилиш учун икки томонлама учрашувлар ташкил этиш режа қилинган.