Ўзбекистон ташқи ишлар вазири Владимир Норов Япониянинг Ўзбекистондаги янги элчиси Такаши Хаторини қабул қилди.

Такаши Хатори Япониянинг Ўзбекистондаги янги элчиси бўлди. 5 декабрь куни у Ўзбекистон ташқи ишлар вазири Владимир Норовга ишонч ёрлиқлари нусхаларини топширди, деб хабар қилди ТИВ матбуот хизмати.

Вазир элчини лавозимга киришиши билан табриклаб, касбий фаолиятида муваффақиятлар тилади.

Суҳбат чоғида Ўзбекистон-Япония стратегик шериклик муносабатлари ва кўп қиррали ҳамкорлигини янада ривожлантириш масалалари муҳокама қилинди. Бўлажак қўшма тадбирлар жадвали ва ташкилий жиҳатлари, жумладан, «Марказий Осиё + Япония» мулоқоти йиғилиши ўтказиш масалалари кўриб чиқилди.

Шунингдек, учрашувда халқаро ва минтақавий масалалар юзасидан ҳам фикр алмашилди.

Япониянинг Тошкентдаги аввалги элчиси Ёшинори Фужияма 2019 йилнинг ёзида ушбу лавозимда иш бошлаган эди.